Hebrews 13

Iziqonqoselo zokucina

1Qhubekani lithandana njengabazalwane.

2Lingakhohlwa ukwamukela izihambi, ngoba ngokwenza njalo abanye abantu bamukela izingilosi bengazi.

3Khumbulani abasentolongweni ngokungathi lani liyizibotshwa kanye labo, kanye lalabo abaphethwe kubi ngokungathi lani uqobo liyahlupheka.

4Ukuthathana kumele kuhlonitshwe ngumuntu wonke, kuthi lombheda wokuthathana uhlale ungangcoliswanga, ngoba uNkulunkulu uzakwahlulela isifebe labo bonke abayiziphingi.

5Ekuphileni kwenu xwayani ukuthanda imali lisuthiseke ngalokho elilakho, ngoba uNkulunkulu wathi, “Kangisoze ngilitshiye; kangisoze ngilidele.”

6Ngakho siyatsho ngethemba sithi, “INkosi ingumsizi wami; kangiyikwesaba. Umuntu angenzani kimi na?”

7Khumbulani abakhokheli benu, abakhuluma ilizwi likaNkulunkulu kini. Cabangani okwavela endleleni yokuphila kwabo lilingisele ukukholwa kwabo. 8UJesu Khristu uyafana izolo lalamhla kanye lanininini.

9Musani ukuhugwa yizinhlobo zonke zezimfundiso ezingaziwayo. Kuhle ukuba izinhliziyo zethu ziqiniswe ngumusa, hatshi yikudla komkhuba, okungelasizo kulabo abakudlayo.

10Sile-alithare abakhonza ethabanikeleni abangelalungelo lokudlela kulo.

11Umphristi omkhulu uletha igazi lezifuyo eNdaweni eNgcwele kaKhulu njengomnikelo wesono, kodwa izidumbu zazo ziyatshiswa ngaphandle kwezihonqo. 12Ngokunjalo uJesu laye wahlupheka ngaphandle kwesango ledolobho ukuba enze abantu bakhe babe ngcwele ngegazi lakhe. 13Ngakho-ke, kasiyeni kuye ngaphandle kwezihonqo silehlazo alithwalayo. 14Ngoba lapha kasiladolobho elimiyo njalo, kodwa sidinga idolobho elizayo.

15Ngakho, ngoJesu, kasinikeleni njalonjalo kuNkulunkulu umhlatshelo wokubonga – isithelo sezindebe ezivuma ibizo lakhe. 16Njalo lingakhohlwa ukwenza okulungileyo kanye lokwabela abanye, ngoba uNkulunkulu uyathokoza ngemihlatshelo enje.

17Lalelani abakhokheli benu lithobele amandla abo. Bayalilinda njengabantu okumele balandise ngani. Balaleleni ukuze umsebenzi wabo uthokozise, ungasindi, ngoba lokho akungeke kube lusizo kini.

18Sikhulekeleni. Sileqiniso ukuthi silesazela esihle njalo sifisa ukuhlala ngobuqotho ngezindlela zonke.

19Ikakhulu ngiyalincenga ukuba likhuleke ukuze ngibuyiselwe kini masinyane.

20Sengathi uNkulunkulu wokuthula, owavusa iNkosi yethu uJesu kwabafileyo ngegazi lesivumelwano esingapheliyo, lowoMalusi omkhulu wezimvu, 21angalihlomisa ngakho konke okulungele ukwenza intando yakhe, njalo sengathi angasebenza phakathi kwethu lokho okumthokozisayo, ngoJesu Khristu, odumo kalube kuye kuze kube nininini. Ameni.

22Bazalwane, ngiyalincenga ukuba libekezelele ilizwi lami lokuqonqosela, ngoba ngililobele incwadi emfitshane nje.

23Ngithanda ukuba likwazi ukuthi umzalwane wethu uThimothi usekhululwe. Angafika masinyane ngizakuza laye sizelibona.

24Bingelelani bonke abakhokheli benu kanye labantu bonke bakaNkulunkulu. Abavela e-Ithali bayalibingelela.

25Umusa kawube lani lonke.
Copyright information for NdeIBE